Молитва
преподобному Паисию Галичскому
О, пречестная и свяще́нная главо́, о́тче, преблаже́нне, а́вво Паи́сие!
Не забу́ди нас до конца́, но помина́й нас во святы́х свои́х и благоприя́тных моли́твах к Бо́гу. Помяни́ ста́до свое́, е́же сам упа́сл еси́, и не забу́ди посеща́ти нас, чад свои́х. Моли́ за ны, о́тче священный, за де́ти своя́ духо́вныя, я́ко име́яй дерзнове́ние к Небе́сному Царю́, не премолчи́ за ны, вопия́ ко Го́споду, и не пре́зри нас, ве́рою и любо́вию чту́щих тя, но помина́й ны, недосто́йныя у Престо́ла Вседержи́телева, и не преста́й моля́ся о нас ко Христу́ Бо́гу, яко дана́ тебе́ бысть благода́ть моли́тися за ны. Не мним бо тя су́ща ме́ртва: а́ще бо и те́лом преста́вился еси́ от нас, но и по сме́рти у́бо жив сый пребыва́вши неотсту́пно от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, Па́стырю наш до́брый. Аще бо и моще́й твои́х ра́ка пред очи́ма на́шима ви́дима есть, но свята́я твоя́ душа́ со а́нгельскими во́инствы, со безпло́тными лики и небесными си́лами у Престо́ла Вседержи́телева предстоя́щи, досто́йно весели́тся. Нам бо у́бо тя ве́дущим вои́стину и по сме́рти я́ко жи́ву ти су́щу, тебе́ припа́даем и тебе́ мо́лимся: моли́ся о нас Всеси́льному Бо́гу о по́льзе душ на́ших и испроси́ти вре́мя на покая́ние, да невозбра́нно преити́ нам от земли́ на Не́бо. Мыта́рств же го́рьких, бесо́в, возду́шных князей и ве́чныя му́ки изба́витися и Небе́снаго Ца́рствия насле́дниками бы́ти со все́ми праведными, от ве́ка угоди́вшими Го́споду на́шему Иису́су Христу́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м и с Пресвяты́м и Животворя́щим Его́ Ду́хом, ны́не и при́сно и во ве́ки веко́в. Ами́нь.
Тропарь
преподобному Паисию Галичскому
глас 8
Днесь возсия́ нам па́мять твоя́, сла́вне Паи́сие, я́ко со́лнце светоза́рное, луча́ми озаря́ющи весь мир, та́ко и ты, преподо́бне, чудесы́ свои́ми тму но́щи злых духо́в от нас отгоня́я; днесь Небе́сныя си́лы, и святы́х А́нгел, и ду́ши пра́ведных мы́сленно торжеству́ют, ра́дующеся; днесь и мы, гре́шнии, припа́дающе честно́му твоему́ о́бразу мо́лимся: о преподо́бне Паи́сие, Христа́ Бо́га моли́ непреста́нно спасти́ святу́ю оби́тель сию́, град и лю́ди, и́же тебе́ почита́ющия.
Тропарь
преподобному Паисию Галичскому
глас 4
Уклонился еси мирския молвы, преподобне отче Паисие, и в тихое пристанище достиг иночествующих обителей: в ней же пребывая, равно ангельно пожил еси, алканием и жаждою, на земле леганием, бдением и всенощным стоянием, и непрестанными молитвами. Отнюдуже видев Бог чистоту сердца Твоего, пастыря во святей обители избранному стаду своему поставляет тя, и образ Пречистыя своея Матери, к тебе во обитель со двумя ангелами пасылает: Емуже ты вся дни живота своего радостно предстоял еси, и ныне на небесех обрете мзду трудов своих, выну со ангельскими лики, и, со всеми святыми, Святей Троице предстоиши, моли и нам спастися чадом твоим и всем достойно почитающим святую память твою.
Кондак
преподобному Паисию Галичскому
глас 3
Возсия́, Го́споди, гра́ду Твоему́ Га́личу, я́ко светоза́рное со́лнце, уго́дник Твой Паи́сий, ра́достно вселе́нную озаря́я свои́ми чудесы́ и приходя́щих с ве́рою ко гро́бу его́ свято́му; та́ко моли́твами Пречи́стыя Богоро́дицы от бед всех нас изба́ви, и упраздни́ ва́рварская шата́ния, и я́ко мы, лю́дие Твои́, Го́споди, и град наш и страна́ вельми́ Тобо́ю хва́лится, и спаса́ется моли́твами преподо́бнаго Паи́сия.
Величание
преподобного Паисия Галичского
Ублажаем тя, преподобне отче наш Паисие, и чтим святую память твою, наставниче монахов и собеседниче ангелов.
