Кондак 1
Возбранный чудотворче, угодниче Христов, к тебе прибегаем и тебе милися деем, услыши нас в час сей молящихся тебе, и буди нам скорый помощник и заступник, да твоими молитвами избавльшеся от всяких бед, вопием ти:
Радуйся, Паисие преподобне.
Икос 1
Ангела во плоти суща тя знаем, отче преподобне, и сего ради призываем тя: предстани нам скоро в помощь и избави нас от всякаго зла, да тобою спасшеся, всегда вопием ти:
Радуйся, от утробы матерния освященный.
Радуйся, светом боговедения просвещенный.
Радуйся, яко мира сего красоту ни во что же вменивый.
Радуйся, яко ангельское житие возлюбивый.
Радуйся, яко собрал еси инок множество.
Радуйся, яко научил еси имети крепкое мужество.
Радуйся, яко учением твоим мнози получиша спасение.
Радуйся, яко тобою получиша общее небесное селение.
Радуйся, яко чисте зриши Святую Троицу.
Радуйся, яко всегда о нас молиши Пресвятую Богородицу.
Радуйся, яко вся прошения наша исполняются.
Радуйся, Паисие преподобне.
Кондак 2
Видящи телесныма очима от Бога посланный к тебе Пречистыя Богоматере образ, принесенный болярином Иоанном Овином, радости многия наполнився, вскоре повеленное от ангел делом совершил еси, вопия к Богу: Аллилуиа.
Икос 2
Разум твердый во удивлении своем сохраняя еси, отче преподобне, видев болярина во внезапном изменении, вопросил еси его о приключшихся ему, уведев же бывшая, радовашеся. Сего ради и мы вопием ти:
Радуйся, от рук Иоанновых образ Богородичен приемый.
Радуйся, яко вся дни живота своего ему послуживый.
Радуйся, яко образом тем Владыка Христос обитель твою прослави.
Радуйся, яко и тебе обители тоя высочайшаго пастыря постави.
Радуйся, яко чудесем от образа бываемым самовидец явися.
Радуйся, яко того ради во всей России имя твое прославися.
Радуйся, яко от всех стран народи во обитель твою притекаху.
Радуйся, яко твоими молитвами от образа Богородична вся полезная приимаху.
Радуйся, стада Христова словесных овец добрый пастырю.
Радуйся, наставниче заблуждших и благий учителю.
Радуйся, избавляяй во тме прегрешений заблудших.
Радуйся, наставляяй на путь спасения хотящих.
Радуйся, Паисие преподобне.
Кондак 3
Силою Вышняго посланнии к тебе два ангела, носяще образ Пречистыя Богородицы, сретоша некоего благоговейна человека именем Иоанна, вручивше его, невидими быша от очию его, он же, образ прием, возопи к Богу: Аллилуиа.
Икос 3
Имущи сомнение в сердцы своем болярин Иоанн о юношах, принесших образ Пречистыя Богородицы, вскоре возвратися в дом свой, хотящи паки видети их, не улучив же видети их, притек во обитель твою, вопияше тебе:
Радуйся, отче, образа Богоматере хранителю.
Радуйся, Пресвятыя Троицы служителю.
Радуйся, недоведомыя тайны зрителю.
Радуйся, чудесем от образа бываемым блюстителю.
Радуйся, преподобных всех известная похвало.
Радуйся, постников многословущая славо.
Радуйся, монахов божественное правило.
Радуйся, всей Галичской стране великое светило.
Радуйся, ангелов собеседниче.
Радуйся, святым всем сопричастниче.
Радуйся, Троицы Святыя чистый служителю.
Радуйся, Паисие преподобне.
Кондак 4
Бурю внутрь имеяй многих смущений, аз многогрешный недоумеваюся, како возмогу достойно воспети твоя подвиги, преподобне, никтоже бо от человек нынешняго рода может я исчести, аще бы и риторски кто глаголати восхотел. Сего ради Богу, тя прославляющему, дерзающе воспеваем: Аллилуиа.
Икос 4
Слышавша града Галича и окрестных градов народи о принесении ангелы Пречистыя Богородицы образа во обитель твою, преподобне, стекахуся отвсюду, носяще недужныя своя, желающе получити исцеление, еже молитвами и прикосновением же пречуднаго образа получивше, отхождаху в домы своя, радующеся. Мы же, дивящеся, похвальная вопием:
Радуйся, о христианстем роде теплый к Богу ходатаю.
Радуйся, недужным и скорбным здравия подателю.
Радуйся, яко твоими молитвами обитель твоя яко солнце просветися.
Радуйся, яко о ней народ не точию видевый, но и слышавый возвеселися.
Радуйся, яко ученицы твои душами просвещахуся.
Радуйся, яко твоими чудесы телесне веселяхуся.
Радуйся, яко твоими молитвами от сетей вражиих свобождаемся.
Радуйся, яко от раки твоея святыя благоухания насыщаемся.
Радуйся, яко прикосновением тоя же раки от болезней исцелевахуся.
Радуйся, яко таковый дар от Бога приял еси.
Радуйся, яко приходящим к тебе с верою неоскудно исцеление подаваеши.
Радуйся, Паисие преподобне.
Кондак 5
Боготечная звезда явился еси, преподобне, Церковь Святую, аки небо, украсил еси и образ, посланный со двема ангелома, в ней поставив, и от всех стран вернии ради моления во обитель твою стекахуся, ты же данною от Христа Бога тебе благодатию тех озарял еси, яко же чудесы, тако и учением наставляя их на путь спасения и повелевая вопити к Богу: Аллилуиа.
Икос 5
Видев ученик твой преподобный Иаков во обители святей созданную тобою и болярином Иоанном церковь возгоревшуюся, в ней же принесенный ангелы Пречистыя Богородицы образ стояще, ревностию разжегся, и всю надежду на Самую Богоматерь и на твои молитвы возложив, разбив двери бревном и сквозе пламень в церковь вниде, и образ Богородицын изнесе, пламени же отвсюду окружающу его и образ ничтоже пострада. Сего ради похвальная приносим ти, вопиюще:
Радуйся, твердое веры основание.
Радуйся, в таковых крепкое имый упование.
Радуйся, такова ученика стяжавый.
Радуйся, на твердем краеугольном камени того наздавый.
Радуйся, яко учением своим, а не млеком сего воспита.
Радуйся, яко в несомненную веру сего наказа.
Радуйся, яко оба Господеви угодиста.
Радуйтеся, яко многи ученики своим учением воздоиста.
Радуйтеся, яко многим ко спасению явистася предводители.
Радуйтеся, яко и нам от волков адских бысте хранители.
Радуйтеся, яко купно предстоите Святей Троице.
Радуйся, яко Царю небесе и земли о нас молишеся.
Радуйся, Паисие преподобне.
Кондак 6
Проповеданную ангелы принесением честнаго образа Пречистыя Богородицы милость, хотящую быти роду христианскому, возобновиша вернии, и на созидание новыя церкве от имений своих подаяху кийждо по силе своей. Ты же, преподобне, оным подаянием новую церковь вскоре воздвигл еси, к содействующему сия Богу вопия: Аллилуиа.
Икос 6
Возсия во обители новосозданная церковь аки второе солнце сияя, народи же, видевше сие, радовахуся и любовию притекающе, от неистощимаго источника Пресвятыя Богородицы целебныя дары приемлюще, и восхваляюще тя, сице вопияху:
Радуйся, добрый винограда Христова строителю.
Радуйся, стада Его хранителю.
Радуйся, всем верным во спасение учителю.
Радуйся, тем же до Царствия Небеснаго предводителю.
Радуйся, незлобивых стада Христова овец во едино совокупителю.
Радуйся, злосмрадных козлищ от стада Христова прогонителю.
Радуйся, молитвенниче о нас к Богу теплый.
Радуйся, ходатаю к Богородице о нас скорый.
Радуйся, яко тобою дерзновение в молитве к Богородице приемлем.
Радуйся, яко тобою вся полезная от Бога приемлем.
Радуйся, скорый нам помощниче;
Радуйся, готовый наш заступниче.
Радуйся, Паисие преподобне.
Кондак 7
Хотящу великому князю Московскому Василию пленити удел дяди своего князя Георгиа, и пришед во страны Галичския настольный дяди своего град Галич, тогда же взя и чудотворный образ, его же принесоша ангели, и отнесе его во свой настольный град Москву, и аки пленницу заключи, преслушав моление твое, преподобне, ты же надеявся несомненно, яко паки образ к вам во обитель возвратится, поя Богу песнь ангельскую: Аллилуиа.
Икос 7
Новое чудо и ужаса исполненное тогда, принесену бо бывшу образу Царицы Небесныя в Москву и в церкви заключенну, замки и печатьми утвержденну, и стражами обстоима свободившая Адама и Еву от ада, хранима аки пленница, невидимою же силою Божиею тоя же нощи обретеся в твоей честней обители в церкви, ты же, сию ощутив, радостне похвальная к Богородице возсылаше, сице глаголюще:
Радуйся, Адамово исправление и Евино свобождение.
Радуйся, пророков оглашение и апостолов удобрение.
Радуйся, мучителя безчеловечнаго изметающая от начальства.
Радуйся, Сына Своего и Бога крепкую силу показавшая.
Радуйся, море, потопившее гордую лютость великаго князя.
Радуйся, каменю, напоивый нас жаждующих потоком чудес Твоих.
Радуйся, судию, неправеден суд судящаго обличившая.
Радуйся, во тме плачевней нас грешных просветившая.
Радуйся, рождшая радость всему миру.
Радуйся, отгнавшая от всех верных печалей зиму.
Радуйся, яко пришествием Святаго Ти образа и нам радость дарова.
Радуйся, яко прежнюю нашу печаль всю отгна.
Радуйся, Мати Господня.
Кондак 8
Странное сие и преславное чудо, егда уведе великий князь Василий, тогда печали и ужаса сердце свое исполни, зазираше себе, како сия дерзновенно содела, егоже несть леть делати, и сего ради со слезами и рыданием моляшеся к Богородице, да явит ему о образе Своем. Егда же от посланных известися, яко во обители твоей, преподобне отче, явися, отнюдуже насилием бысть тогда взята, воспел еси к Богу песнь Ангельскую: Аллилуиа.
Икос 8
Весь радости исполнився великий князь и синклит его о обретении чудотворнаго образа Пречистыя Богородицы, дивящеся неизреченной Божией премудрости, како невидимо силою Сына Своего из церкви изыде, замком и печатем целым сущим и стражем бдящим. Мы же, ведуще, яко твоих ради молитв сия содеяся, вопием ти:
Радуйся, светлый светильниче.
Радуйся, пастырю словесных овец.
Радуйся, монахов истинный отец.
Радуйся, яко твоими молитвами великаго князя суровое дерзновение обличивый.
Радуйся, яко его вся тщетная мысль упразднися.
Радуйся, яко ты во смирении своем возвеселися.
Радуйся, яко чудотворный образ сподобися зрети.
Радуйся, яко пред ним вся дни живота своего изволил еси бдети.
Радуйся, яко и по смерти своей самую Пречистую Богородицу зриши.
Радуйся, яко Престолу Сына Ея предстоиши.
Радуйся, Паисие преподобне.
Кондак 9
Всякое естество ангельское удивися великому дарованию, свыше от Бога тебе данному, преподобне, яко в немощней своей человечестей плоти сущи, по всему уподобився ангелом, и силою Вышняго укрепляем, во всех добродетелях довольно изобиловал еси, сего ради чистою своею душею причтен ко ангельским силам, поющи всесильному Богу: Аллилуиа.
Икос 9
Витийския и риторския многовещанныя глаголы вся отвергши, истинным своим сердцем и чистою совестию в песнех величаем тя, преподобне, и почитаем богоугодная твоя дела и славу, приглашающе пети тебе таковая:
Радуйся, яко Христа ради распятся мирови.
Радуйся, яко вся мирская во уметы вменив.
Радуйся, яко плоть свою поработив духу.
Радуйся, яко духом служаще Богови день и нощь.
Радуйся, яко телом живяще во юдоли земней.
Радуйся, яко душевное си око носяще в Иерусалиме горнем.
Радуйся, и ныне тамо пребывавши.
Радуйся, яко нас, на земли сущыя не оставляеши.
Радуйся, яко о нас грешных мольбы к Богу приносиши.
Радуйся, яко от Него к нам милость ходатайством своим износиши.
Радуйся, яко мы тя за сие благодарим.
Радуйся, яко имя твое святое всегда славим.
Радуйся, Паисие преподобне.
Кондак 10
Спастися хотящим вождь был еси, преподобне, и ныне нам грешным, спасения желающим, помози святыми своими молитвами, и якоже жив сый, многи ученики своя, Христови угодивших, представив, тако и нас, свободив от прелести греховныя, чистых Христу представи, да зовем Ему: Аллилуиа.
Икос 10
Стена крепкая и необоримая, и покров был еси своим учеником, защищающи их от волков адских, сохраняющи от стреляний бесовских, и ныне нам грешным буди стена и покров, прибегающим к тебе и требующим от тебе помощи, да зовем ти:
Радуйся, отцев славо.
Радуйся, преподобных похвало.
Радуйся, постников украшение.
Радуйся, мучеников сопричастниче.
Радуйся, пустынножителем сообщниче.
Радуйся, истинныя христианския веры ревнителю.
Радуйся, противящихся вере святей искоренителю.
Радуйся, церковное украшение.
Радуйся, обители святей разширение.
Радуйся, яко обитель твоя ныне молитвами твоими стоит нерушима.
Радуйся, яко и во веки имать стояти невредима.
Радуйся, Паисие преподобне.
Кондак 11
Пением твоим Бога и Его Пречистую Богоматерь, живущи на земли, прославлял еси вся дни живота своего, сего ради и мзду трудов своих восприят, вселился еси в небесных селениях, идеже выну поют ангельстии чины; с ними же живущи, поеши всегда к Богу песнь сию: Аллилуиа.
Икос 11
Светоприемный свещник на месте высоце, а не под спудом стоящий, во тме греховней сущих зрим тя, преподобне, с невещественными бо в вышних предстоиши Престолу Пресвятыя Троицы, радости превеликия исполнився и божественными лучами трисолнечнаго света осияваем, облистаеши верных, вопиющих тебе таковая:
Радуйся, заре, являющая покаянием день спасения.
Радуйся, всех грешных покаянием ко Христу приводящи.
Радуйся, данным ти от Христа ключем Царствие Небесное отверзаеши.
Радуйся, покаянием грешников в него вводиши.
Радуйся, кормчий корабля Христова, в нем же спасошася мнози.
Радуйся, яко учением своим многотекущую источил еси реку.
Радуйся, яко жаждущих твоего учения напоил еси потоком сладости.
Радуйся, яко твоего учения рекою доплыхом в землю обетованную.
Радуйся, яко пристахом в тихое пристанище.
Радуйся, яко наследовахом землю обетованную.
Радуйся, яко получихом прежде многих лет обещанную.
Радуйся, Паисие преподобне.
Кондак 12
Благодать дадеся тебе от Бога, яко и прочим святым целити души и телеса с верою притекающим к раце твоей святей. Сего ради молютися, преподобне Паисие, и к раце твоей святей припадая вопию: исцели мою душу и болезнь во здравие вскоре премени, да тобою получив здравие, воспою Богови песнь ангельскую: Аллилуиа.
Икос 12
Поюще твоя труды и подвиги, преподобне, восхваляем тя вси, яко от юности своея явился еси храм Святаго Духа: сего ради к раце твоей честней во храм Божия Матере притекающе, вопием ти:
Радуйся, врачу душами болезнующих.
Радуйся, целителю телесными недуги озлобленных.
Радуйся, наказателю сущим во младости.
Радуйся, жезле сущим в старости.
Радуйся, яко святая твоя душа в небесных скиниях почивает.
Радуйся, яко имя твое святое на земли прославляемо бывает.
Радуйся, яко призыванием имени твоего святого болезни врачуются.
Радуйся, яко твоими молитвами беснующиися от мучительства диаволя свобождаются.
Радуйся, яко всякая язва в людех целится.
Радуйся, яко вси, притекающии ко гробу твоему с верою, спасаются.
Радуйся, Паисие преподобне.
Кондак 13
О всеблаженный и приснопамятный угодниче Божий, преподобне отче Паисие, предстоя Престолу Владыки Христа, не забуди нас грешных и нынешнее наше приими приношение, всегда о нас пребуди моляся, избавитися нам от напастей и всяких болезней, и вечнаго мучения благоприятным твоим ходатайством, да с тобою воспеваем к Богу всегда: Аллилуиа.
Этот кондак читается трижды
Затем икос 1 и кондак 1
Икос 1
Ангела во плоти суща тя знаем, отче преподобне, и сего ради призываем тя: предстани нам скоро в помощь и избави нас от всякаго зла, да тобою спасшеся, всегда вопием ти:
Радуйся, от утробы матерния освященный.
Радуйся, светом боговедения просвещенный.
Радуйся, яко мира сего красоту ни во что же вменивый.
Радуйся, яко ангельское житие возлюбивый.
Радуйся, яко собрал еси инок множество.
Радуйся, яко научил еси имети крепкое мужество.
Радуйся, яко учением твоим мнози получиша спасение.
Радуйся, яко тобою получиша общее небесное селение.
Радуйся, яко чисте зриши Святую Троицу.
Радуйся, яко всегда о нас молиши Пресвятую Богородицу.
Радуйся, яко вся прошения наша исполняются.
Радуйся, Паисие преподобне.
Кондак 1
Возбранный чудотворче, угодниче Христов, к тебе прибегаем и тебе милися деем, услыши нас в час сей молящихся тебе, и буди нам скорый помощник и заступник, да твоими молитвами избавльшеся от всяких бед, вопием ти:
Радуйся, Паисие преподобне.
